由《Guardians of the Galaxy（銀河守護隊）》導演James Gunn執導嘅《The Suicide Squad》預告片出咗啦。除咗保留小丑女Harley Quinn、指揮官Rick Flag同迴力鏢隊長 Captain Boomerang之外，亦加入多位新角色，其中由史泰龍配音嘅鯊魚王，搞笑形象仲搶戲過小丑女！

2016年上映嘅《Suicide Squad》雖然票房成績亮麗，全球大收7.45億美元，可惜口碑就麻麻，所以電影公司就搵咗Marvel導演James Gunn執導重啟版《The Suicide Squad》。除咗保留包括小丑女嘅幾位靈魂人物之外，通通換曬做新角色，並且加入唔少搞笑元素。預計今年8月6日於美國及HBO Max同步上映，至於香港幾時上就暫時未有消息。

劇情講述犯人們為減少刑期而組成Suicide Squad，受政府命令下前往位於南美洲嘅小島，摧毀納粹時期遺留落嚟嘅頓海姆監獄同實驗室。從預告片可以睇到，喺鬼才導演James Gunn操刀下，每個人物都加入咗唔少搞笑元素，其中由史泰龍聲演嘅King Shark平常講嘢雖然搞笑，但認真起上嚟絕不手軟，一出手就將一個士兵撕開一分為二，歡迎程度絕對唔比小丑女遜色。

電影靈魂人物小丑女亦換上全新造型，咁次就唔係「BIG」爆超薄白T配迷你熱褲，變成紅色露背連身裙，唔知大家又鍾意邊個look多啲呢？

官方亦同時曝光多張角色個人海報，設計風格同電影宣傳海報一樣，充滿70年代戰爭電影海報味道。