當年仲未有Facebook，中文版維基百科又未流行嗰陣，相信大家無論上網搵資料定係問問題或多或少都會接觸過Yahoo知識。最近Yahoo知識+宣布，網站將於4月20日轉成唯讀模式，並於5月4日正式關門大吉，結束營運長達16年服務。

相信有返上下「網齡」嘅朋友，都知道Yahoo知識除咗可以問正經嘢，亦會有人喺上面問埋啲「膠」嘢，例如「我今年xx歲，下面得xx cm長，算唔算正常。」、「打得飛機多會唔會影響身高發育」、「呂布（字奉先）發明鳳仙雪條對後世有咩影響？」等等。面對呢啲「膠」問題，有唔少熱心網友都會認真回答，不過最好笑就係睇到一齊玩嘢嘅網友妙問妙答。

Yahoo知識+早於2004年開始提供服務，當時Google仍未普及，大家多數用Yahoo做搜尋引擎，所以每次search嘢都經常見到Yahoo知識+嘅文章。入面臥虎藏龍，小至搭邊條巴士路線去某區，大至相對論、量子力學都有人可以為你解答。由於歷年嚟經過多次改版，以及Facebook及維基百科等網站興起，網絡生態產生翻天覆地變化，導致Yahoo知識+步向衰落。

即使今時今日已經無咩人用Yahoo知識+，如今宣布關門大吉，代表一代集體回憶正式走入歷史。想Backup嘅朋友仍然可以喺6月30日之前登入Yahoo知識+下載當年問過嘅問題，其後將會正式刪除。