近日動漫界最大新聞莫過於《進擊的巨人》完結，整個網絡充斥住各種結局解讀文章，粉絲們相繼爭論「神作」定「爛尾」等等。日本電視台TBS亦趁著「巨人」完結熱潮，於新聞節目「新・情報7daysニュースキャスタ」專程訪問講談社編輯「川窪慎太郎」。川窪先生於節目內分享15年前同「諫山創」嘅結識過程，並曝光當年《進擊的巨人》原稿。

川窪先生憶述，佢喺15年前加入講談社，頭一年做編輯嗰陣有一半時間都只係接下電話，咁啱有一日接到諫山老師嘅自薦來電。當時諫山創只係一個寂寂無名嘅設計學校學生，到處投稿尋求出版機會。

之後川窪先生就走入辦公室拎出《進擊的巨人》原稿，一邊向鏡頭展示，一邊就講笑咁話當年諫山老師真係畫得非常之求其同夠晒亂。話雖如此，當年川窪先生睇到原稿仍然覺得非常震撼，表示感受到諫山老師嚟自靈魂嘅吶喊，理解到諫山老師有幾想見到作品問世，所以向上司力薦《巨人》。

當記者問到最終話嗰陣，川窪先生表示諫山老師喺3月30日夜晚將原稿拎嚟編輯部，當時總編及所有編輯都一齊歡迎諫山老師，並同佢講「辛苦了！」。當時諫山老師就表示：「本來以為會喊或者湧現更多情感，點知攰到喊都無力，好開心終於可以畫出無可妥協嘅原稿。」

不過最終話推出後，唔少粉絲都不滿呢個「無可妥協」結局，更有海外粉絲發起聯署要求諫山老師重寫結局。唔知隨住呼聲越嚟越大，巨人會唔會好似EVA咁再出多個結局呢？

資料來源：新・情報7daysニュースキャスタ