碧咸好波加靚仔有型大家都知，就算佢仲當打嘅時候，坊間都已經有傳言佢總有一日會進軍荷里活。而唔覺唔覺，碧咸就已經掛靴近8年，今日佢就正式公佈進軍電視圈嘅計劃，不過就唔係拍劇，而係以製作人嘅身份製作一系列與足球有關嘅紀錄片及真人騷。

在 Instagram 查看這則貼文

Studio 99（@studio99）分享的貼文

碧咸日前於MIPTV (唔係電視台，而係類似Filmmart嘅電視節目版)中，透露其名下製作公司「Studio 99」即將製作一系列足球節目。當中包括紀錄碧咸如何成立「邁阿密國際 (Inter Miami CF)」嘅紀錄片《Inside Inter Miami》、又會有講述英超成立頭十年，由國家聯賽發展成全球娛樂節目嘅紀錄片《A Whole New Ball Game》，亦會有講Adidas鬥Puma嘅球鞋之戰《World War Shoe》。

在 Instagram 查看這則貼文

Studio 99（@studio99）分享的貼文

而如果你係好想睇到碧咸本人個靚仔樣，就要留意Studio 99同Disney+合作嘅《Save The Sqaud》。該節目係一個實境真人騷，由碧咸本人主持，節目中佢會回到7歲時踢波嘅東倫敦街場，教依家嘅小朋友踢波。「我由7歲就踢緊草根足球同星期日聯賽，個節目就係希望回饙足球界，畀機會小朋友可以同我一齊工作，聽下我當年嘅經驗。」

另外碧咸亦提到籌備緊佢嘅個人自傳式紀錄片：「我覺得呢啲嘢 (自傳紀錄片) 只可以做一次，而依家我嘅事業又進入後球員時代嘅興奮時刻，加上呢行 (運動紀錄片) 又越黎越勁，似乎依家就係一個講我自己故事嘅好時間。」