正呀喂！喺手機玩《孖寶》、《薩爾達》

文：MenClub Patrick　　圖：互聯網
POSTED ON 18 Mar 2015

人所共知，近幾年家用遊戲機市場俾手機game蠶蝕得好緊要，連PlayStation前董事總經理項明生，都話佢係睇到呢點先至跳槽過手遊公司Gameone！全球仍然有咁多人玩嘅PlayStation都逃唔過呢個命運，更何況市場已經萎縮咗好多嘅任天堂！不過任天堂咁大間公司，當然唔會坐喺度等收皮，所以佢終於出招，喺尋日開咗個記招，由社長岩田聰親自宣布，會同日本大型手機遊戲公司DeNA合作，將任天堂一系列名作開發成手機game app，即係話以後大家可以喺手機上面玩正統嘅《孖寶》、《薩爾達傳說》等game！

其實我哋呢代人，大部分都係打紅白機或超任打大，點都對呢啲名作有感情，只不過叫我哋買部Wii、Wii U或3DS嚟玩，又真係唔會囉，但係將佢哋變晒手機game，大家真係會樂意玩好多！而且任天堂仲打算行會員制，目標係今年秋季開始營運，畀人用固定月費（或年費）去玩game，咁樣綑綁式收錢法，似乎會好搵過係逐隻game賣添喎，睇嚟任天堂終於開竅喇！

咁呢件事係咪代住任天堂會放棄家用機市場呢？又唔係喎！相信任天堂都估到會有呢類揣測，所以喺記招上派定定心丸，公布已經着手開發下一代主機，代號叫做「NX」。之但係部機最快要到下年先會正式發表，暫時仲未知有乜新慨念。好心任天堂快手啲啦，再冇突破性嘅新機出，個市場好快冇晒㗎咋！而我個人就覺得，既然咁多人懷念紅白機，將新機個樣整成復刻紅白機咁款，有得諗喎！