最近EA流出一份內部文件，顯示EA用盡各種手段吸引《FIFA 21》玩家投入「FIFA Ultimate Team，FUT」模式，以抽寶箱形式鼓勵玩家們課金抽卡，被指鼓吹賭博。

據外媒CBC報導，一位內部員工流出一份長達54頁嘅文件，當中一項重點指出公司要「用盡方法吸引玩家投入（Ultimate Team模式）」。喺呢個遊戲模式內，玩家可以課金「抽Pack」或卡牌市場交易，從而獲得不同球員，砌一隊自己心儀嘅隊伍，以增加遊戲勝算。爆料人同時指出，雖然《FIFA 21》玩家可以唔課金咁玩FUT模式，但就要不停做無聊任務同打比賽慢慢賺Coins去買卡包。

面對指控，EA發言人Charlie Fortescue聲稱文件被外界錯誤解讀，表示「EA所有遊戲都能夠喺課金情況下暢玩，而具大多數玩家都從未課過金。」強調EA無強迫玩家課金抽卡。另外，EA嘅聲明亦堅決否認抽寶箱模式涉及賭博成份，表示只要無辦法套現成現金，就唔叫做賭博。

（圖片截自：CBC）

近年遊戲界抽寶箱（Loot box）模式備受爭議，被指同賭博無異，雖然官方無提供方法畀玩家將遊戲虛寶套現成現金，但玩家們仍然可以私底下透過現金交易，變相一樣可以套現。據遊戲市場分析公司Niko Partners數據，EA上年就因為玩家課金抽寶箱及買卡而大賺14.9億美金（約115億港幣）。