日本超人氣動畫電影《鬼滅之刃劇場版 無限列車篇》，自上年推出以嚟破盡各項記錄，除咗連續12周成為日本票房冠軍，更打破《千與千尋》票房記錄，榮登日本影史最賣座電影。最近電影於美國正式上映，兩個禮拜都唔夠就成為周末票房冠軍，對上一次日本電影稱霸美國票房已經係22年前嘅《超夢夢反擊戰》。

據美國電影票房統計網站資料，《鬼滅》於上月23日喺美國上映後，首周票房已經刷新美國外語電影票房記錄。而上映第二周（4月30-5月2日），更錄得高達640萬美金票房，小勝《Mortal Kombat》620萬美金，奪得周末票房冠軍。

（圖片截自：ANN NEWS）

據日媒ANN NEWS報導，雖然美國確診病例有下降趨勢，但可以放映嘅戲院同入場人數仍有所限制，預計隨著市場逐漸恢復，票房將會繼續增長。