搭戴「天和」核心艙嘅長征五號B遙二運載火箭於上周四（29日）成功升空，雖然任務成功，但其重達21噸第二節助推器殘骸正於太空翻滾墜落。專家估計殘骸最快周六（8日）重返地球，暫時無法計算具體墜落位置，未被大氣層燒盡殘骸碎片或會擊中人口稠密地區。

綜合《SpaceNews》及《The Guardian》等外媒報導，呢段名為「2021-035B」嘅火箭殘骸長30米、闊5米、重達21噸，目前喺距離地球300公里嘅低軌道以時速約2.8萬公里翻滾旋轉，每90分鐘環繞地球一周。

美國國防部發言人Mike Howard表示，太空司令部（AFSPC）正密切追蹤火箭殘骸去向，估計殘骸最快周六（8日）重返地球，但要到重返前幾個鐘先能夠計算出確實墜落位置。

（圖片截自：The Sun）

哈佛大學天文物理學家Jonathan McDowell對《The Guardian》表示，估計重達21噸火箭殘骸進入大氣層時唔會完全燒盡，部份碎片將會墮落地球表面，覆蓋範圍可以達160公里，相當於一架小型飛機失事墜毁。按目前殘骸移動路徑推算，碎片墜落範圍北至紐約與北京，南至智利及紐西蘭威靈頓，當中涵蓋香港。不過Jonathan McDowell亦指出，由於地球有71%係海，殘骸墜落海洋機率較高，叫大家唔使咁擔心。

資料來源：The Guardian、SpaceNews、The Sun、orbiting now