由萬代出品嘅高達模型GUNPLA，從1980年發行至今已經40多年，一直係眾多模型愛好者必買珍品。最近日本網友「tem'sガンプラ工房」喺Twiier分享咗佢20年嚟嘅珍藏，總共多隻1600隻GUNPLA，瞬間吸引高達迷及模型迷轉載留言。

ガンプラ部屋の棚を整理中。試しに床に敷き詰めてみたらお花畑のような素敵な光景に。プラモじゃないのも混じってるけど1500体以上あるはずです。多分。 #ガンプラ好きと繋がりたい #ガンダム pic.twitter.com/A1zaOxv2Ef

— tem'sガンプラ工房 (@museum_tem) March 29, 2021

根據「tem'sガンプラ工房」所講，由於20年前返夜班，所以無咩時間同朋友出去玩，就開始砌GUNPLA打發時間，砌下砌下就砌咗咁多隻。隨著技術日漸純熟，依家喺禮拜休息嗰陣，可以一口氣砌7-8隻（會唔會攰過返工！），原本全部都係放喺櫃入面，只不過要打掃所以先拎晒出嚟，單係打掃個櫃搬嚟搬去都用咗5-6個鐘。

可以見到「tem'sガンプラ工房」將每隻GUNPLA分類好咁放晒入櫃，收藏數目同模型鋪有得揮。如果按佢20年砌1600隻咁計，即係平均5日左右就完成一隻，確實係超級發燒友。