距離Ver 2.0更新一個月，Capcom於香港時間昨晚終於就公佈咗《Monster Hunter Rise》嘅3.0更新內容，不過就頗令人失望地只係公佈咗一隻新魔物，而且憑更新路線圖黎睇，似乎Ver 3.0就係最後一次免費更新。即刻就睇睇究竟3.0有啲咩新嘢先啦。

《MHR》Ver 3.0最搶眼嘅更新，就係追加《Monster Hunter Generations Ultimate》中首次出現嘅天彗龍，而且係變異版本「秘紅赫耀的天彗龍」，由個名到條龍個樣再到預告中出現嘅招式都非常中二；另一隻「新」魔物就係「首領雷狼龍」，主要分別就係由綠色電光變做金色電光，同時首領雷狼龍，以及之Ver 2.0追加嘅首領火龍、首領角龍似乎都於集會所任務中出現，而不止於百龍夜行。

另外就係Ver 2.0更新時就已經有講到嘅遊戲結局，不過發佈會中淨係播咗雷神龍與風神龍同時出現嘅畫面，目前未知實際任務係一次過打兩隻，定係兩隻會合體變做一隻新魔物。

更值得留意嘅，或者係發佈會尾聲嘅《MHR》更新路線圖。6月中會更新與《Monster Hunter Stories 2》嘅聯乘項目，亦即係艾路貓外觀裝備，而6月尾就唔會有Ver 4.0，而係Ver 3.1，更新內容就係「付費追加內容」以及「活動任務」。實際上按路線圖所顯示，一路去到7月尾嘅Ver 3.2及8月尾嘅Ver 3.3都只係會有「Capcom聯乘合作」、「付費追加內容」同「活動任務」更新，亦即係話Ver 3.0好可能係最後一次免費更新。更重要嘅係，目前推出嘅「付費內容」全部都係語音、外觀裝備等等可有可無嘅嘢，如果未來嘅「付費內容」都係同類，咁睇黎各位《MHR》玩家好快就要搵定新Game玩啦。