最近印度出現一單奇聞，有位新娘於婚禮途中不幸意外猝死，按常理就應該立即消取婚禮處理後事，點知雙方家屬唔單只冇叫停婚禮，更一致決定由新娘阿妹頂上代嫁，直到婚禮結束女方家屬先幫新娘子舉行喪禮。

據外媒Dailymail報導，喺上禮拜新娘Surbhi以及新郎Manjesh Kumar按印度教傳統舉行婚禮，點知新娘喺交換花環後突然心臟病發，就算屋企人立即去隔籬村搵醫生急救，可惜最終亦返魂乏術。但兩家人冇取消婚禮不特止，更將Surbhi遺體先安放到一間房，並達成協議改由Surbhi妹妹代替出嫁。事後新娘嘅哥哥Saurabh就向記者透露，由於事出突然大家都唔知點算好，有人就提議不如將妹妹嫁畀新郎，兩家人商討完一輪最終同意呢個決定。

原新娘圖片（圖片截自：Dailymail）

而新娘嘅叔叔Ajab Singh就表示，繼續進行婚禮對兩家人嚟講都係一個「艱難嘅決定（tough call）」。一個女嘅遺體就安放喺一間房，而另一個女就喺隔籬房舉行緊婚禮，從未試過有咁複雜嘅情緒。

原新娘妹妹。（圖片截自：Dailymail）

對於雙方家屬冇取消婚禮嘅原因，外媒Dailymail就作出以下猜測，一方面係女方家屬已經準備好嫁妝（印度傳統係女方出嫁妝兼包辦婚禮費用），另一方面就係男方已經搞咗場大龍鳳，如果冇帶新娘返屋企會好冇面，所以先會發生一件咁嘅事。不過無論真相係點都好啦，相信兩家人心情都一定非常複雜，諗過度過先會做出呢個決定。