《LOL英雄聯盟》作為電競界最受歡迎嘅遊戲之一，雖然推出已超過10年，但至今仍然有大批玩家支持，每日遊玩嘅玩家據統計超過2700萬人，實在係一個非常驚人嘅數字。而去年下旬推出嘅手機版《LOL》 - 《英雄聯盟：激鬥峽谷》，亦深得玩家喜愛，並將於本週末進行香港地區夏季總決賽。

誕生不足一年嘅《英雄聯盟：激鬥峽谷》，好快就獲得肯定並舉行具規模嘅大型比賽，黎緊週末進行嘅香港地區夏季總決賽，受關注程度甚至有電視進行轉播。

自今年5月1日起，《英雄聯盟：激鬥峽谷》其實已經展開香港地區季賽，當中有50隊參戰，其後經過多番淘汰賽後最終剩餘4隊。4支隊伍將於總決賽對決，其中四強賽會以BO5單淘汰進行，而總決賽則以BO7單淘汰進行。

總決賽大會亦相當貼心，將會以廣東話進行線上旁述，令一眾觀眾更能夠投入其中。今次賽事冠軍將可以獲得$36000獎金，亞軍則有$25000獎金，而冠、亞軍兩支隊伍亦將會獲得代表香港參加激鬥峽谷Icon Series ­— 夏季超級杯嘅資格。

今季賽事東南亞賽區除左香港之外，分別有印尼、馬來西亞、新加坡、台灣、泰國、菲律賓及越南，每個國家嘅實力亦不容少襯，希望香港隊伍加油！