目前《龍珠超》漫畫雖然仍在繼續，但動畫早前已經暫時於《力之大會》篇章悟空加菲利擊敗吉連後完結，而當中悟空與吉連嘅對決相信依然為人津津樂道。

而近日一款由Figurama Collectors推出嘅1/6比例精緻雕像「悟空 vs 吉連」（GOKU VS JIREN ELITE EXCLUSIVE STATUE），重現二人嘅終極對決，模型嘅精神程度可以用「神還原」黎形容。

故事當中吉連自認為最強戰士，其實力亦一直處於悟空之上，但悟空緊急關頭成功領悟「自在極意功”兆”」，與吉連打成5050。不過，其後吉連開啟全力模式之下，「自在極意功”兆”」悟空並唔係其對手，直至最後關頭100%「自在極意功」終於開啟下，先將吉連打至重傷，最終憑住悟空加菲利合力之下先將吉連打下擋台，助第七宇宙取得勝利。

而今次嘅模型「悟空 vs 吉連」，就係將悟空同吉連嘅對決重現，1/6嘅比例，尺寸全高 45 公分、寬 66 公分，二人上半身更可替換，分別係銀髮使出龜波氣功嘅自在極意悟空對上使出紅色能源波嘅全力吉連，以及「自在極意功”兆”」嘅悟空對上普通吉連。

除左兩位主力之外，旁邊嘅佈景亦非常生動，其中更有移動嘅全王宮殿，實在係非常仔細。另外亦可以將多出黎既上半身放喺支架上展示，其中下面更配有標誌性嘅龍珠4星球。