講起恐怖漫畫，相信大部份人第一時間就會諗起伊藤潤二，除咗廣為人知嘅出道之作《富江》，另一部作品《漩渦》亦係一代經典。幾年前美國成人動畫電視台Adult Swim就計劃將《漩渦》改編成短篇黑白動畫《Uzumaki》，並預計今年播出，可惜受到疫情影響，播出日期推遲至2022年10月。日前官方就公開兩條預告片，帶大家先睹為快。

據了解，《Uzumaki》將會分成4集，由動畫公司Production I.G及Cartoon Network共同製作，《惡之華》、《蟲師》導演長濱博史執導。劇情講述女高中生五島桐繪同男朋友齋藤秀一住喺受到詛咒嘅黑渦鎮，隨住鎮上接二連三出現一連串超自然事件，二人設法阻止小鎮進一步失控...

《咒術迴戰》反派夏油傑招式致敬《漩渦》。

伊藤潤二被譽為恐怖漫畫大師，出道之作《富江》先後被翻拍成多部真人電影及電視動畫。而佢嘅《漩渦》亦係另一部經典之作，就連近年嘅人氣漫畫《咒術迴戰》都有份致敬伊藤老師。雖然《漩渦》喺2000年都改編過電影，奈何真人電影難以達到漫畫嘅恐怖視覺效果，所以口碑麻麻，相信今次改編動畫唔會令粉絲再次失望。