好多人遇到緊張或煩惱情緒，都會不其然咁做出咬手指、啪手指、「UN腳」等小動作舒解壓力，早些年市面上就出現過一粒叫「Fidget Cube」嘅骰仔畀各位狂撳減壓，如果大家嫌唔夠經典，或者可以考慮下任天堂新出嘅扭蛋。出咗名識做生意嘅任天堂今次將經典「紅白機手掣」切開三份，各自整成一粒正方形嘅鎖匙扣，而且上面啲掣仲可以瘋狂咁撳。

呢套扭蛋系列名為「コントローラーボタンコレクション」，全套有7款造型，分別係十字鍵、AB鍵同埋選擇及開始鍵。除咗有大家熟悉嘅日版紅白機（Famicom）紅金配色手掣，就連俗稱為「灰機」嘅歐美版主機（NES）灰黑色手掣都有份，而且仲有一款隱藏版造型，唔知係咪特別配色呢？

呢款產品將於6月25日起，依次喺日本多間NintendoTOKYO POP-UP STORE透過專用扭蛋機發售，每款500日圓，有興趣又身處喺日本嘅朋友記得留意以下時間表啦。

資料來源：Twitter@Officialstore