唔少高達模型迷都鍾意發揮創意將自己心愛機體改造一番，最近日本就有位神人就用特別嘅「舊化」技術，將《機動戰士高達 馬沙之反擊》入面嘅「RX-93-ν2 Hi-ν高達」樹木化，寓意戰爭結束後嘅和平世界。

據Oricon報導，作者「のうちの模型部屋」（Twitter@nouchimokeibeya）表示，由於主角經常用高達對抗敵人，令好多人都覺得高達象徵住壓倒性擊退敵軍，實際上高達只係武器嘅一種，當戰爭結束後同樣會損壞同被遺忘。今次將高達模型「樹木化」，旨在寓意戰後嘅和平世界，植物將會喺頹垣敗瓦當中再次生長開花結果。

「のうちの模型部屋」就喺Youtube分享咗佢嘅製作過程，當中涉及N個雕刻及上色步驟，齋係條片都已經18分鐘，可想而知實際改造過程花咗幾多心血同時間。

作者亦有其他別具心思嘅改造作品，有興趣嘅朋友可以喺佢Twitter同Youtube Channel了解更多。

資料來源：oricon、Twitter@nouchimokeibeya