如果大家對香港嘅天價租金愈嚟愈失望，同時又冇咩包袱可以話走就走，或者會對呢間日本公司嘅新計劃有興趣。最近日本租屋公司「Hobimo」推出新計劃，物色緊10組幸運兒（2人一組，共20人），以月租20,000日圓（約$1,400港幣）住進千葉縣沿海大屋三個月，而且距離東京只有一個鐘車程！

不過咁荀嘅租金都有代價嘅，由於今次Hobimo旨在招募「監督員」體驗一下佢哋嘅房屋，所以每組租客居住期間要喺社交媒體分享心得，即係要Post下IG讚或彈下間屋咁解，7月10日開始接受申請。

由於日本鄉村房屋空置問題嚴重，Hobimo就睇準商機喺全國多地不停翻新空置房屋，藉此提供廉價租屋服務，月租一律為40,000日圓（約$2,800港幣，包水電），主打鍾意滑浪、鄉村以及遙距辦公人士，而且每個選址都唔會離市中心太遠。如果咁好彩冇咩包袱嘅朋友，係咪睇到有啲心郁郁呢？

資料來源：waval.net、Hobimo