日本BANDAI NAMCO Entertainment於今日公開高達PC遊戲新作、第一人稱射擊遊戲《GUNDAM EVOLUTION》，預計2022年正式上架。遊戲預定為基本免費，但有課金元素（都係嗰味嘢啦），第一波封測將於8月舉行，有興趣嘅朋友可以報名搶先體驗。

遊戲玩法類似《Overwatch》，玩家將會分成兩隊（6 vs 6）駕駛MS互射搶據點。首發12款可選機體以UC世紀為主，其中就有RX-78-2、渣古Ⅱ、沙煞比等熱門機體，相信日後正式版會加入更多機體。

首波封測將於8月8及9日舉行，預定招募5000名玩家測試，由即日起開放接受申請，不過就未知官方會唔會鎖海外IP。另外官方亦會喺7月17日夜晚舉行線上發布會，透露更多遊戲詳細內容，仲要有伊織萌做主持添！