由韓國開發商Krafton製作嘅大逃殺遊戲《PUBG（絕地求生）》，憑住刺激又多樣嘅玩法吸引大量玩家加入，更由PC版延伸到家機及手機平台。今日官方就宣布將同Netflix動畫《惡魔城（Castlevania）》製作人Adi Shankar合作，推出《PUBG》改編動畫。由於冇透露具體劇情，唔少人（包括我）都非常好奇「食雞」究竟可以有咩故仔，唔知大家又諗唔諗到劇情係咩呢？

Adi Shankar係一份聲明表示「作為一位玩家，自2017年PUBG推出以嚟，我一直喺呢片戰場上搏殺。非常感謝Krafton對我嘅信心同信心，對我嚟講呢部作品可以進一步建構遊戲產業同荷里活之間嘅橋樑，並且非常期待向大家展示咩叫做『winner winner chicken dinner』。」至於具體劇情就未有透露，不過Krafton CEO 金昌漢就話嚟黎會分享更多動畫嘅相關消息。

事實上遊戲改編成動畫嘅例子比比皆是，例如《The Witcher》、《Resident Evil 》、《Tomb Raider》、《Dote》等等，不過以上例子都係本身就有好好嘅劇情，反觀《PUBG》除咗跳傘殺人就冇故仔可以講，所以先令大家咁驚訝，大家就一齊期待下Adi Shankar會創作出一個咩故仔啦！（斷估唔會抄返日本電影《大逃殺》啩？）