據《Bloomberg》報導，著名遊戲開發商動視暴雪（Activision Blizzard）遭到加州「公平就業與居住部門（DFEH）」起訴，指公司女員工受到不公平薪酬對待以及性騷擾，而且高層亦冇正視相關問題，助長惡劣職場文化。

根據訴訟文件內容，DFEH指出動視暴雪女性員工大約佔20%，公司無論喺升遷、薪酬、工作分配方面都會「重男輕女」。而且大部份女性都遭受過「兄弟會（frat boy）」職場文化騷擾，男性員工會飲醉酒喺辦公室隔間之間爬嚟爬去騷擾女同事，又會公開講咸濕笑話同強姦話題，更有女員工表示自己曾被趕出哺乳室，全因男同事要拎間房嚟開會。

（圖片截自：DFEH訴訟文件）

訴訟文件亦引用一宗特殊事件，指一名女員工長期遭到性騷擾，同一名男高層出差期間自尋短見，事後發現個位男高層喺出差途中有帶情趣用品，甚至之前同其他同事分享過女員工裸照。

對於上述指控，動視暴雪出聲明強調公司重視職場多樣性，唔容許任何形式嘅性騷擾行為，並會認真調查每項指控（都係個啲官腔嘢啦），不過就話員工去世事件同本案無關，叫DFEH唔好拉埋嚟講。