自從Blue Origin曝光可重用運載火箭「New Shepard」開始，就一直有唔少網友笑外型似陽具，隨住Jeff Bezos完成首次太空之旅，網上更充斥住各種抽水meme圖。最近就有火箭專家解釋，「New Shepard」外型設計係經過工程師N次測試而成，能夠減少空氣阻力之餘，又可以最大化機艙空間。繼我話齋，形狀尺寸都唔重要，最緊要係啱用，見到Jeff Bezos可以安全返回地面發表事後心得，就證明支嘢夠晒掂！

根據外媒《Business Insider》報導，美國安柏瑞德航空大學教授及工程師Pedro Llanos表示，Jeff Bezos起初將「New Shepard」定位為載人火箭，所以設計一直以最大化機艙空間、能夠容納4-6名乘客為主，並為咗乘客有更好嘅太空體驗，進一步增大觀景窗尺寸。

Pedro Llanos繼續解釋，圓錐形嘅太空艙能夠減少火箭升空時嘅空氣阻力，並考慮到太空艙返回地面嗰陣能夠保持隱定，最好就係將艙底設計得更寬，簡單嚟講即係形狀最好上窄下寬。經過Blue Origin工程師測試超過100款形狀後，最後選出依家所見到嘅模樣。

左至右：New Shepard、Falcon 9（圖片截自：Blue Origin）

至於火箭推進器方面，一般嚟講火箭飛行目標愈高，就要配備更大支甚至多節推進器，例如SpaceX現役兩級入軌運載火箭「Falcon 9 Block 5」顧名意義就有兩節推進器，可以飛往軌道執行各種任務。相反「New Shepard」目標只係飛到太空邊緣畀乘客體驗下無重狀態同望下地球，所以一節推進器都夠晒用，點知個推進器咁啱設計得又短又粗，搞到配埋個太空艙就好似男性生殖器。

以下係Twitter網友製作嘅一系列meme。