獲獎無數嘅張藝謀可以稱得上係中國數一數二嘅名導，曾拍出《活着》、《大紅燈籠高高掛》、《英雄》、《紅高粱》等優秀作品，不過2016年嘅中美合拍超級大作《長城》就惡評如潮，無論國內定係海外影迷都一致負評，當時更有中國影評人高呼「張藝謀已死」。最近劇中主角Matt Damon就喺Podcast節目坦言，當我知道張藝謀因為荷里活資方壓力，而犧牲自己對電影嘅諗法嗰陣，呢部電影就注定會失敗。

《長城》演員陣容鼎盛，有Matt Damon、Pedro Pascal、劉德華、彭于晏多位知名影星。

《Saving Private Ryan（雷霆救兵）》、《Good Will Hunting（驕陽似我）》以及《Bourne（叛諜追擊）》系列演員Matt Damon，近日接受Podcast節目《With Marc Maron》訪問時透露，阿女會成日笑佢職業生涯當中幾個「錯誤決定」，其中一個就係出演2016年嘅《長城》。Matt Damon向主持人Marc Maron坦言，當我知道中國名導張藝謀因為荷里活資方壓力，而選擇犧牲自己對電影睇法嗰陣，我就知道呢部電影注定會失敗，意味著災難即將發生，令到劇情唔連貫，無辦法成為一部電影。

（圖片截自：IMDB）

除此之外，因為當時《長城》將白人演員Matt Damon定位成救世主，所以被唔少媒體批評係文化挪用（cultural appropriation）。對此，Matt Damon亦喺訪問入面作出回應「我對《長城》嘅睇法同《Lawrence of Arabia（沙漠梟雄）》、《Dances With Wolves（與狼共舞）》以及《Avatar（阿凡達）》一樣，都係講述一個外來者走入一個新文化，從中搵到該文化嘅價值，並用外來嘅技術為當地人提供幫助，最後大家都有所改變。」

（圖片截自：IMDB）

可惜嘅係，觀眾嘅睇法就同Matt Damon唔一樣，《長城》無論票房定口碑都仆直，呢方面就連佢個女都知。Matt Damon表示阿女每次提到呢部戲都會稱之為「The Wall（城）」，然後Matt Damon糾正佢係「The Great Wall（長城）」嗰陣，阿女就會話「爸爸，呢部戲一啲『Great』嘅地方都冇啊！」

順帶一提，《長城》亦係「景甜宇宙」作品之一。（圖片截自：IMDB）