早於今年一月，日本成人用品品牌TENGA為咗開發太空用飛機杯，宣布聯同新創公司「星際科技」展開「TENGA ROCKET」計劃。經過半年有多嘅募資及建造，日前TENGA終於喺北海道成功發射「愛與自由與 TENGA」火箭上太空，並將1000名男士願望傳遞到浩瀚嘅宇宙，而艙內嘅吉祥物TENGA機械人亦都順利返回地球。

由於疫情嘅關係，TENGA並冇搞大型嘅火箭發射儀式，全程採用線上直播形式進行，等各位粉絲可以安坐家中一齊見證歷史性一刻。

隨住火箭不斷攀升，美麗嘅藍色星球逐漸映入眼簾，飛至90km嗰陣成功將1000名男士願望連同飛機杯一齊「射」到太空，最後順利返回地球。

今次計劃唔單只係TENGA嘅自娛自樂，火箭上亦有配備傳感器嘅Space Tenga原型機，所收集返嚟嘅數據能夠有助開發太空使用嘅TENGA飛機杯。相信假以時日，就連喺太空站工作嘅太空人都可以解決性需要，宇宙再孤獨都可以充滿溫暖！