（圖片截自：The New York Times via John Chapple/SplashNews）

美國殿堂級搖滾樂隊Nirvana成立於1987年，被譽為將Grunge Rock打入主流嘅重大功臣，其中1991年推出嘅《Nevermind》更係史上最暢銷專輯之一，全球銷量超過3,000萬張，而封面所用嘅「全裸BB」相亦成為一代經典。但點都估唔到30年後，相中人Spencer Elden近日以「兒童色情」及「兒童性剝削」為由起訴樂隊成員、唱片公司以及攝影師，要求15名被告每人至少賠償15萬美元。

從《Nevermind》封面可以見到一個全裸BB喺泳池入面追住一張鈔票，外界普遍都認為張相只係諷刺資本主義嘅藝術照片。不過相中人Spencer Elden就有另一番解讀，覺得追逐鈔票呢個構圖會令BB睇落好似一個性工作者，同時又話影相嗰陣自己得4個月大，根本冇得Say No，認為張相係兒童色情。Spencer Elden又指自從唱片問世後，佢嘅裸照就一直廣傳到世界各地出售，令佢永遠遭到「 兒童商業性剝削（commercial child sexual exploitation）」，而且父母亦冇簽署過任何授權文件，多年身心飽受困擾並且需要接受心理治療，繼而起訴攝影師、唱片公司以及樂隊成員。

《Nevermind》25周年重拍封面照。（圖片截自：BBC via JOHN CHAPPLE）

事實上，Spencer Elden曾經喺《Nevermind》問世10、17、20、25周年多次落水重拍封面照，其中25周年個次，佢仲主動建議全裸還原經典，不過當時攝影師覺得繼續全裸會有啲奇怪，所以先叫佢著返條泳褲。之但係呢，佢喺25周年重拍前，又同傳媒透露過每次去睇棒球比賽，都會覺得在場所有人可能見過自己「何B仔」，而感到困擾同被冒犯。究竟張相真係對佢生活造成困難，定係純粹錢作怪，可能只有佢自己先知，唱片公司同Nirvana暫時未有回應。