近期中國官媒接二連三出文狠批「飯圈」文化及「娘炮」審美觀，揚言要整頓歪風引惹起熱議。如今國家終於出手，中國國家廣播電視總局辦公廳今日正式發布通知，要求影視產業「樹立愛黨愛國、崇德尚藝的行業風氣」，禁一切止唔符合「官方價值觀」嘅人物、節目及外型，堅決杜絕「娘炮」審美觀及偶像養成節目。

（圖片截自：國家廣播電視總局）

該份通知總共有8大項目，而最受關注嘅主要係前3項，當中講述節目組要嚴格把關選用演員及嘉賓，所有政治立場不正確、同黨及國家離心離德、衝擊社會公平正義底線、言行失德嘅人緊決不用。另外又要求廣播機構、網絡平台禁播「偶像養成節目」以及「星二代真人Show綜藝節目」，同時為咗堅定文化自信、大力弘揚中華優秀傳統文化，堅決杜絕「娘炮」畸形審美，要求節目組嚴格把關演員表演風格及服飾妝容。

換言之，近年喺中國非常火熱嘅《偶像練習生》、《創造101》、《青春有你》等男/女團養成節目將會全面禁播，而《爸爸去哪兒》呢類星二代親子真人Show節目亦難逃一劫。

《披荊斬棘的哥哥》截圖。

有趣嘅係，最近男團競選節目《披荊斬棘的哥哥》曾經「溫馨提示」嘉賓唔好做出咬唇、扮鬼臉、眨單眼等「油膩」行為，當時中國網民都以為係純粹搞下笑，覺得節目組非常幽默。點知喺今日發現呢個「溫馨提示」同國家政策不媒而合，先知原來節目組當時唔係講笑，實在用心良苦！