近日中國頒布遊戲禁令，嚴格限制未成年人打機時長，不過正所謂「上有政策，下有對策」，尋日官媒就踢爆市面存在大量帳號租借服務，未成年人只要畀33蚊人民幣就可以租帳爽玩兩個鐘頭《王者榮耀》，更有店舖設有24小時營業服務，有錢就唔慌冇機打。報導出街後，騰訊隨即宣布已向20多個間賬號交易平台及電商平台起訴或發函，要求停止相關服務，非常高效。

據央視新聞指出，自遊戲禁令推出以嚟，遊戲帳號租賣服務形成灰色產業鏈，未成年人可以透過租借/購買帳號繞過監管無限制打機。記者更親自實測，喺一間店鋪用33蚊人民幣租咗2個鐘《王者榮耀》帳號，並按店家指示成功進入遊戲界面，整個過程都冇觸發任何實名認證系統，繼而大嘆「如何防沉迷？」。

（圖片截自：微博@騰訊遊戲）

事後騰訊亦非常之有效率，同日就喺微博宣布已向超過20間賬號交易平台及電商平台起訴或發函，要求停止相關服務。並呼籲有關當局盡快推出相關法規，嚴格管制帳號租賣行為。