雖然戴安娜王妃已離開人世24年，但佢留低嘅故事同衣著品味，至今仍吸引唔少影視人翻拍。除咗可以喺Netflix人氣劇集《The Crown（王冠）》見到戴妃多個經典造型，由《Twilight（吸血新世紀）》女星Kristen Stewart主演嘅傳記電影《Spencer》亦即將喺11月上映，日前官方就公開正式預告，唔知大家覺得Kristen Stewart還唔還原到戴妃嘅神韻呢？

《Spencer》由《Jackie（第一夫人：積琪蓮甘迺迪）》導演Pablo Larraín執導，Kristen Stewart飾演戴安娜王妃、Jack Farthing飾演查理斯親王。劇情聚焦喺1991年短短幾日嘅聖誕節假，講述戴安娜王妃下定決心同查理斯親王離婚嘅心路歷程。電影特登選用黛安娜王妃原姓氏「Spencer」命名呼應主題，早排喺威尼斯影展首映嗰陣就獲得全場觀眾起身鼓掌長達3分鐘，同時廣獲多間歐美權威媒體一致好評，不過香港會唔會上映就暫時未有消息。

同場加映由Emma Corrin飾演嘅戴妃，相信電影上映後，兩位女星自不然會被外界拉埋一齊比較，睇下邊個還原度高啲！