近年Jeff Bezos及Elon Musk兩大富豪從地面鬥到上太空，為各自「太空夢」展開一場明爭暗鬥，成為大眾津津樂道嘅話題，不過佢哋嘅老朋友Bill Gates似乎就唔滿意呢種做法。近日Bill Gates被問到點睇時下億萬富豪熱衷於太空旅遊，佢就略帶諷刺表示「太空？地球仲有好多嘢要做！」，意指大家應該處理好地球上嘅疾病、氣候問題，先好諗上太空。

今次可以稱得上係「太空旅遊元年」，Richard Branson、Jeff Bezos、Elon Musk旗下太空科技公司都相繼完成首次太空旅遊任務，其中Richard Branson同Jeff Bezos更係親身上陣，用行動證明畀大眾睇太空旅遊相當安全，只係差在你畀唔畀得起錢參加，事關呢幾趟停留喺太空幾分鐘嘅旅程，就要用上數十億美元。事後亦都引嚟唔少人批評佢哋嘥錢，其中聯合國秘書長António Guterres就話「與其花費數十億美元上太空兜風，不如幫助數以百萬計嘅饑民。」

早前Jeff Bezos完成太空旅遊首航後，忽發奇想話要將所有污染產業移至太空，保護美麗嘅地球，被環保人士批評講法「離地」。

對於呢股太空熱潮，近日Bill Gates就喺清談節目《The Late Late Show with James Corden》表示：「我致力研究緊瘧疾、愛滋病等疾病嘅治療方法，並喺各個雞尾酒會談論呢啲疾病，講到其他人都覺得我煩。太空？我認為地球上仲有好多嘢可以做。」主持人James Corden亦都好識搞氣氛，稱Bill Gates係「唯一冇打算坐太空船離開地球嘅億萬富豪」以表謝意。

自從Bill Gates喺2000年卸任Microsoft CEO後，就成立比爾及梅琳達·蓋茨基金會（Bill & Melinda Gates Foundation），專注消除饑荒、扶植教育、環境衛生、氣候變化等多個議題，又投資多間綠色能源公司，同埋出書探討氣候危機。