今年動視暴雪（Activision Blizzard）可謂一波未平一波又起，早喺今年7月先被加州「公平就業與居住部門（DFEH）」起訴，指控對女員工薪酬待遇「大細超」、縱容男員工肆無忌憚騷擾女同事。最近又被「美國公平就業機會委員會（EEOC）」起訴職場性騷擾以及性別歧視，不過今次暴雪就選擇用錢解決，宣布已同EEOC達成和解，承諾設立1,800萬美元賠償基金，補償所有合資格受害員工。

早喺今年7月，動視暴雪因涉嫌職場性騷擾及性別歧視遭到DFEH起訴，指公司無論喺升遷、薪酬、工作分配方面都會「重男輕女」，而且大部份女員工都遭受過「兄弟會（frat boy）」職場文化騷擾，男員工會飲醉酒喺辦公室爬嚟爬去騷擾女同事，又會公開講咸濕笑話同強姦話題，繼而引起一連串罷工、罷玩活動。

當暴雪仲煩緊同DFEH嘅官司嗰陣，最近另一個政府機構「美國公平就業機會委員會（EEOC）」就以性別歧視、歧視為由起訴暴雪，但今次雙方好快達成和解，暴雪承諾設立1,800萬美元基金補償所有合資格受害員工，有剩就捐晒去促進性別平等、協助女性喺遊戲產業發展嘅慈善機構，總算化解咗一單官非。

備註：EEOC同DFEH兩宗訴訟各自獨立，換言之暴雪仍然要面對DFEH嘅起訴。