早前同大家報導過，有傳《人中之龍》總監名越稔洋將會離開任職近32年嘅SEGA，跳槽到中國網易帶領新團隊開發新作。就喺今日稍早時間，SEGA正式宣布「人中之龍工作室」總監名越稔洋及製作人佐藤大輔離職，由團隊元老成員橫山昌義接棒，不過個傳聞只係應驗咗一半，暫時未有官方消息指名越稔洋加入網易。

SEGA表示2021年係「人中之龍工作室」創立10周年，一路從《人中之龍》系列走到《審判之眼》系列，非常感謝各位玩家一直以嚟嘅支持，並打算藉由10周年呢個契機宣布改組。新任製作總指揮橫山昌義表示，雖然名越稔洋以及佐藤大輔離開團隊，但向大家承諾會繼承前人嘅信念製作往後作品，新作《人中之龍8（暫稱）》將會描寫春日一番後續故事。

1989年加入SEGA嘅名越稔洋，因製作《超級猴子球》、《人中之龍》系列聲名大噪，經常出席遊戲宣傳活動，係公司靈魂人物之一。不過因為上年喺節目公開取笑《魔法氣泡》電競選手ともくん睇落鐘意食「芝士牛丼」（日本網絡用語，用嚟笑人係宅男）而引起爭議，搞到冇得再做SEGA董事同首席內容官（CCO），唔少網友都認為辭職同呢件事有關。