相信每位追求真實感嘅機迷，都希望玩射擊遊戲嗰陣真係有把槍揸手，而唔係透過滑鼠或者粒蘑菇掣瞄準敵人。最近眾籌平台Indiegogo就出現咗一款槍形手掣，除咗有步槍形態，仲可以隨時變身成普通手掣模式打RPG遊戲。

呢個聲稱全球首款嘅鐳射瞄準槍形手掣《OneShot》，握把設計類似PlayStation嘅DUALSHOCK，同樣由蘑菇掣、十字鍵以及「圓圈正方三角交叉」組成，但佢除咗可以當成普通手掣用，只要扭一扭手腕就可以變成一把「槍」，再放埋個接收器喺電視機前面，接收返手掣所發出嘅鐳射信號，就可以精準瞄準敵人。

目前《OneShot》就喺Indiegogo眾籌緊，價格尚未公布，如果第時有機會推出市面，唔知大家會唔會有興趣呢？溫馨提示，Indiegogo同埋Kickstarter等眾籌平台曾經有過唔少詐騙或貨不對辦嘅例子，所以大家支持創作者嗰陣都要注意一下，或者等到真係有實物先考慮。