自疫情出現後，好多餐廳都用上膠板隔開客人保持社交距離，但無論係透明亞加力膠板，定抑或係全白瓦通膠板，都難免會影響食客觀感。最近日本有間旅館就諗到一個實用又美觀嘅方法，聯同百字老字號燈籠店推出「燈籠晚宴」，以巨型透明燈籠取代普通防疫隔板。

位於東京嘅「虹夕諾雅 東京（星のや東京）」因應疫情下嘅新常態生活模式，日前結合日本傳統文化推出「燈籠晚宴（提灯会食）」專案，將客人安排到一間冇任何隔板嘅房間用膳，取而代之就係多個巨型燈籠。

每個燈籠都由京都百年燈籠店「小嶋商店」以傳統工藝製作，直徑75cm、高102cm，前方有一塊0.15mm厚嘅膠膜阻隔飛沫，而後方就係鏤空保持空氣流通，頭頂仲有一個柔光燈泡幫你打燈，無論影食物定係朋友影你都會好睇啲。