近期Netflix超人氣劇集《魷魚遊戲》席捲全球，就連睇冇得睇Netflix嘅中國亦非常多人討論，多次登上微博熱搜榜前幾位，淘寶湧現大量週邊產品。最近中國影音平台優酷就似乎想食住個勢，喺噚日宣布推出新綜藝節目《魷魚的勝利》大玩兒時遊戲，但由於節目名同埋內容，甚至海報上個Logo都似足《魷魚遊戲》，所以今次大量微博網民都撐唔落自己人，紛紛留言鬧優酷丟臉。

事源於噚日（20日）優酷宣布推出新綜藝節目《魷魚的勝利》（暫定名字），內容主打「智力與體力大挑戰、一場大型兒時遊戲回憶殺、強劇情推進寶藏綜藝」，再加上海報設計用上圓圈、三角，正方等符號而惹起爭議，大量微博網民感到不滿留言指優酷非常丟臉，甚至反問中國人有咩兒時遊戲同「魷魚」有關。

眼見事情愈演愈烈，優酷當晚就火速出文道歉，表示因為工作失誤，唔小心將「毙掉」（Ban掉）嘅設計初稿放咗出嚟，同時貼出新海報以公布新節目名稱《遊戲的勝利》。但網民對呢個解釋就唔多賣帳，紛紛恥笑張新海報似係臨急抱佛腳整出嚟，希望直接成個節目都可以「毙掉」。

微博網民唔滿意優酷嘅說法。（圖片截自：微博）