有玩過小島秀夫作品嘅朋友，應該都認同佢係一個「被遊戲耽誤嘅電影工作者」，事關佢經常喺遊戲用上大量電影式敘事過場，甚至喺最近一部作品《死亡擱淺》搵嚟多位影星及電影人客串演出，有時都唔知係打緊機定睇緊戲。如今，佢終於踏出第一步追求佢嘅電影夢！就喺今日稍早時間，小島工作室（Kojima Productions）宣布將於美國洛杉磯成立新部門，專攻電影、電視及音樂業務。

據外媒GamesIndustry.Biz報導，新部門設立於美國影視重鎮洛杉磯，由曾經喺Sony PlayStation任職近28年，擔任過首席法務官及商務副總裁嘅Riley Russell主理，專攻電影、電視及音樂內容業務，旨在提升小島工作室旗下IP影響力及知名度，並且成為流行文化一部份。

小島秀夫本身就係一個超級電影迷，就連Twitter自我介紹都話身體有70%由電影所組成，除咗鍾意將電影敘事風格融入遊戲，平時亦都會喺Twitter分享電影/劇集心得，今次新部門成立終於有機會畀佢大展拳腳。之不過目前小島工作室旗下只有《死亡擱淺》呢個IP，唔知未來有冇機會睇到電影版呢？