喺一眾主流串流平台之中，Netflix的確可以話對日本動漫最為重視，除咗如《JoJo》等大熱動畫之外，黎緊亦會有集日本動畫界三大巨頭：荒木哲郎、虛淵玄、小畑健嘅動畫電影《泡泡》，今日亦公佈埋最新預告。

《泡泡》講述東京突然落下能瓦解重力嘅泡泡雨，於是年輕人於東京嘅高樓大廈中展開跑酷大戰。某日主角「響」墜入「扭轉重力之海」，被突然出現嘅少女「詩」所救，而發展出往後嘅故事。從預告估計大概會係一套集青春、動作於一身嘅動畫。

不過《泡泡》最吸引人嘅未必係個劇情，而係佢個製作班底。動畫監督係曾擔任《Death Note》、《學園默示錄》、《進擊的巨人》導演嘅荒木哲郎，幾乎保證《泡泡》動作埸面一定好睇；而人設就由著名漫畫家、《Death Note》作畫小畑健擔任，幾乎保證《泡泡》啲女角一定靚女。而劇本方面就係由「惡名昭彰」嘅虛淵玄擔任…唔知會唔會係「Bad End」路線？

《泡泡》由製作過《進撃的巨人》嘅WIT STUDIO製作，志尊淳、宮野真守、梶裕貴、畠中祐等擔任聲優。電影會於2022年4月28日於Netflix上播放，5月13日於日本院線上映。