講起日本新年，相信唔少人都會諗起歷史悠久、由NKH舉辦嘅「紅白歌合戰」。不過據報，呢個舉行到72屆嘅日本年度盛事，今年好可能會係最後一屆。

同絕大部份長壽節目一樣，紅白近年來一直面對收視率下跌 (同佢自己早年嘅紀錄比呀下) 嘅問題，就算多次改制都未見起色。而近日NHK放送總局長正籬聡近日就向媒體表示，會對電視台所有節目，包括長壽節目或新開節目進行評估，以決定其去留。其中長壽節目如「ガッテン!」、「バラエティー生活笑百科」以及5點鐘新聞都被認為冇得留低。而據《週刊文春》報導，NHK局長前田晃伸就係今次節目評估嘅推手，甚至曾向另一名電視台高層直言「我要停咗紅白佢」。而當記者就此事詢問前田晃伸時，佢就回應：「我冇話今年就會停咗佢，但下年我就唔知啦。對長壽節目進行評估都唔係啲好出奇嘅事。」

今年由川口春奈與大泉洋分任紅白組主持

作為一個本質上嘅音樂節目，「紅白」嘅收視率其實係與日本音樂界嘅發展息息相關，只要能夠邀請當年嘅大熱歌手演唱大熱歌曲，該節收視就會上升。問題係隨住日本音樂越見百花齊放，歌手、歌曲嘅號召力自然減少，忠實嘅高齡觀眾以及需要爭取嘅年輕一代口味亦極為不同，收視冇可能同六、七十年代閒閒地都70%以上相比。而幾十年來基本冇變過嘅「男女分隊」模式放於今時今日亦的確頗有年代感。睇返日本Twitter，網民就似乎樂見「紅白」完結，各位又點睇呢？

資料來源：Nifty News