EA去年11月推出著名系列《Battelfield》嘅新作《Battlefield 2042》，結果就因為超多Bugs再加平衡性問題，幾乎一出就被玩家們唾棄，於Steam上嘅評價到目前都仲係超過70%玩家畀負評嘅「大多負評」，EA亦要面對一眾玩家嘅怒火。正當大家都開始唔記得件事之際，近日就有人流出EA內部對於《Battlefield 2042》失敗嘅檢討會議錄音，發現EA高層們竟然唔係反省自己做錯啲咩，而係瀨去年12月推出嘅《Halo Infinite》做得太好。

件事最早係由美國遊戲記者Tom Henderson爆出，指近日EA內部就開咗個20分鐘嘅「《Battlefield 2042》負評檢討會」，檢討會理應係講下點解《2042》搞到一鑊粥呀，下次點做好啲呀咁，但據報EA高層們就將問題瀨落去《Halo Infinite》，以及PC玩家們部電腦太廢之上，簡單黎講即係千錯萬錯都唔係我EA錯。

新聞曝光之後，EA當然又迎來網民謾罵，而EA副總裁John Reseburg就即刻出黎澄清，有關報導係斷章取義，並唔係會議嘅真實意思。結果《PC Gamer》立馬跳出黎，話佢哋收到匿名讀者提供檢討會嘅部份錄音，聽完之後就發現係EA 首席營運官 Laura Miele嘅發言。

w

圖片：截圖自 Steam

據《PC Gamer》報導，Laura Miele話《2042》一開始其實係有「穩定」及「正面」嘅評價，每日玩家人數亦「睇落幾好」，但到下一個星期就一切都唔好，原因係《Halo Infinite》無預警推出多人模式，而且「佢哋打磨得非常好，雖然 (多人模式) 只佔整個遊戲嘅一少部份，但真係做得好好。咁對於我哋黎講就唔係一個有利嘅比較，特別係我哋又有Bugs，又打磨得冇咁好」，似乎就證實當日Tom Henderson話EA「瀨《Halo Infinite》」係冇錯。