由韋家輝編導監，劉青雲、林峯及蔡卓妍領銜主演嘅懸疑驚悚警匪片《神探大戰》，講咗咁多年終於有消息！日前官方正式公開預告片及海報，並定檔4月率先喺內地上映，至於香港就要睇下戲院幾時重開。

《神探大戰》故事講述一位自稱「神探」嘅兇手，運用私刑殺害多位嫌疑犯公然挑戰警察，警方隨即派出以「神探夫婦」方禮信（林峯 飾）及陳儀（阿Sa 飾）為首嘅重案組作出調查。與此同時，因患有精神病而撤職嘅前「神探」李俊（劉青雲 飾），亦為咗證明自己唔係癲佬所以加入調查，三方「神探」各自為自己嘅正義展開一場大戰。

從預告片可以見到，身穿黃色雨衣嘅劉青雲喺明渠上自言自語，幾經掙扎後決定跳入洪水之中，當中仲閃過幾個持槍挾持人質嘅畫質。而片尾所引用嘅「 怪物戰鬥，小心自己成為怪物。」更係耐人尋味，莫非暗示緊劉青雲就係兇手？實情就要等正式上映後先知喇~