探險故事總係引人入勝，而芸芸眾多探險故事中，由美國薛克頓 (Sir Ernest Shackleton)帶領嘅「堅忍號 (Endurance)」南極探險船，或者就係當中最出名嘅一個。而近日福克蘭海事文化基金會 (Falklands Maritime Heritage Trust) 就成功發現已經沉沒超過100年嘅堅忍號，而且船身非常完整，連船尾嘅鑲字「Endurance」都清晰可見。

圖片：Falklands Maritime Heritage Trust

要知道堅忍號嘅故事，就要由薛克頓爵士講起。薛克頓爵士於1874年出生於愛爾蘭，10歲時隨家人搬到倫敦生活。自小就對出海有濃厚興趣嘅薛克頓爵士於1899年加入著名嘅英國皇家地理學會，1901年跟隨海軍軍官兼極地探險家Robert Scott第一次試圖尋找南極點，但最終只能於距離南極點850公里嘅地方折返。

1907年薛克頓爵士自行組建探險隊，並得到英國國王、王后接見及授與國旗，乘坐「寧錄號 (Nimrod)」探險船再次出發到南極。但佢今次依然無法到達南極點，只能於距離南極點97公里嘅地方插上英國國旗，但已經係當時地球上最接近南極嘅人。回程時佢哋因為缺乏食物而挖出去程時埋掉嘅馬屍，結果一行四人染上痢疾。為咗避免停於南極岸邊嘅寧錄號唔等埋佢哋就離開，薛克頓爵士與另一名較健壯嘅伙伴率先出發，留下另外兩名伙伴於有儲備嘅中途站等待，喺搵到寧錄號後薛克頓爵士又立馬折返回中途點營救另外兩名伙伴，最後四人全部獲救。薛克頓亦因此而被封爵。

沉沒中嘅堅忍號

薛克頓爵士登陸南喬治亞島

圖片：Wikipeida

然後就到著名嘅1914年堅忍號探險。由於1911年挪威人Roald Amundsen已經率先到達南極點，所以今次薛克頓爵士將目標改成徒步橫越南極大陸，但堅忍號到達南極海域後就被浮冰圍困，薛克頓爵士與另外27名船員因安全考慮而落船於浮冰上紮營。飄流10個月後堅忍號終於沉沒，薛克頓爵士一行人被困於浮冰之上，5個月後連塊浮冰都完全破碎，薛克頓爵士帶領船員登上三隻來自堅忍號嘅救生艇，用七日七夜到達無人居住、亦唔喺任何航線之上嘅象島。

為咗求救，薛克頓爵士連同五名最健壯嘅船員，乘坐嘅一艘長7米嘅救生艇，用16日穿過天氣惡劣嘅1,300公里，最後於1916年5月20日，於風暴中強行登陸英屬南喬治亞島，至今都被認為係航海史上最大成就之一。登陸後薛克頓爵士再徒步翻過南喬治亞山脈，向當地捕鯨站求救，三日後薛克頓爵士就已經登上捕鯨船，試圖回到象島解救其餘船員。最後於8月30日、經過四次嘗試，終於搵到條穿過浮冰嘅航線抵達象島，另外22名船員全數獲救。

圖片：Falklands Maritime Heritage Trust

正正就係因為薛克頓爵士呢段史詩式嘅冒險失敗、成功獲救故事，令堅忍號成為英國人熟知嘅探險船。日前福克蘭海事文化基金會就成功於44米深嘅海床上，搵到沉沒咗過百年嘅堅忍號。從圖中可見木造嘅堅忍號至今結構大致完整，但因為國際法嘅關係，研究團體只能拍攝或掃瞄堅忍號遺骸，而不能接觸船上任何地方及物件，所以無法打撈上水、亦無法帶回任何「紀念品」。

資料來源：Edurance22.org