無論係大家自己當年做小朋友，定係依家你養緊個小朋友，大家應該都知，絕大部份家長其實係唔知小朋友之間流行緊啲咩玩意，對小朋友黎講非常重要嘅對戰，對家長黎講都只係兩個小朋友喺到激動大叫。但日前日本網民「あら子 (@rei15448346)」就遇到兩個不尋常嘅媽媽，唔單止肉緊地睇兩個仔玩Pokemon卡牌對戰，仲狠狠地批評個仔嘅牌組，睇黎本身都係一個Pokemon卡牌高手！

公園で男の子2人がポケモンのカードバトルをやってて、その傍らでママ達が喋ってたから「あぁこうやって子ども達が遊んでくれるとゆっくり話せていいよね????」
って思ったけどよく見たら
「そのデッキでどう勝つの！？ちゃんと考えな！？」ってママ達2人ともめっちゃ本気でバトルしてた

— あら子 (@rei15448346) March 16, 2022

本身都係媽媽嘅「あら子」上週於Twitter發文，話佢早排喺公園見到兩個小朋友玩緊Pokemon卡牌對戰，而兩個媽媽就企喺一邊傾計，あら子本來以為兩位媽媽都係襯兩個仔玩緊，自己講下八卦，點知竟然無意中聽到其中一媽媽話：「咁嘅牌組你諗住贏？你有冇諗過架？」先發現原來兩位媽媽對於個仔嘅Pokemon卡牌對戰超級認真，而且非常想個仔贏！

考慮到Pokemon卡牌最早於1996年就面世，距離依家都廿幾年，換言之呢兩位媽媽細個時好可能都係Pokemon卡牌嘅玩家之一，到依家做埋媽媽都依然保有一顆「小精靈訓練員心」，似乎都好合理！

あら子嘅發文引來近十萬個讚好、過萬個留言，網民一方面認為件事本身好有趣，另一方面亦非常羨慕兩位小朋友擁有完全理解自己興趣嘅媽媽；亦有人話如果自己仔女嘅話，應該都會係咁。但亦有人留言指，媽媽都支持玩Pokemon卡當然係好，但呢位媽媽似乎都幾嚴格。