隨住政府宣佈戲院可於4月21日重開，各大院線亦公佈4、5月嘅上映檔期，其中《哈利波特》衍生作《怪獸與牠們的產地》嘅第三集《怪獸與鄧不利多的秘密 (Fantastic Beasts: The Secrets Of Dumbledore)》將會於4月21日當日上映，而早於3月頭上映嘅《Batman》就定於4月27日上映。

認真去計，兩部電影都比外國上映時間要稍遲，其中《怪》美國定於4月8日上映，《Batman》更係3月4日上咗、4月19日即將登陸HBO Max。但值得慶幸嘅係香港觀眾能夠準時於5月4日睇到Marvel新作《Doctor Strange in the Multiverse of Madness》，大家唔使驚網上劇透；而Tom Cruise主演嘅《Top Gun: Marverick》亦會於5月26日準時上映。另外，將於美國4月1日上映、由Jared Leto主演嘅《Morbius》，香港就會延到5月19號上。

另外，於香港戲院2月停業期間，於外國上咗再落埋嘅災難片《Moon Fall》，亦被本港院線安排4月21日戲院重開當日上映。反觀一眾港產賀歲片就未見有安排，或者係等到下個新年先上？