香港時間昨日早上舉行嘅奧斯卡頒獎典禮，咩戲拎咗咩獎未必人人知道，但肯定全世界都知Will Smith 摑咗Chris Rock一巴，然後全世界都喺到討論「Will Smith打得好」、「護妻好有型」、「打人就唔啱」、「講下笑都唔得？」、「夾埋谷收視咋下嘛？」。事隔一日，Will Smith就於IG上向被打嘅Chris Rock公開道歉，而且姿態放得頗低，件事又係咪咁就平息呢？

圖片：willsmith on IG

Will Smith 於香港時間今早於IG發文，劈頭第一句就已經寫到：「任何形式的暴力都係有惡意以及破壞性的。我昨晚於頒獎禮的行為是不能接受而且不能原諒的。」然後指出笑話本身就係佢自己工作嘅一部份，但當有人拎佢太太Jada嘅身體狀況黎講笑，「對我黎講就太難受，所以我作出情緒化的反應。」

然後佢就開名向Chris Rock道歉，「我希望公開向你道歉，Chris。我越線了而且我做錯了。我感到羞愧，而且我的行動不代表我想成為的人。在愛與良善的世界容不下暴力。」接下來佢就分別向奧斯卡主辦方、所有現場來賓及直播觀眾，以至Williams及King Richard家庭道歉，「我對於我的行為感到後悔，它沾污了原本應該係光榮的旅程。」最後寫到「我仍在進步 (I am a work in progess)」。

據外媒引述有份去頒獎禮派對嘅Sean "Diddy Combs指，原本係好朋友嘅Will Smith及Chris Rock兩人於派對中就已經和好，「一切都過去了，佢哋仍然係好兄弟」。而掌摑事件後執法當局確定Chris Rock不打算提告，所以無法控告Will Smith傷人；但另一邊廂嘅奧斯卡主辦方就對於Will Smith打人相當不滿，有傳研究緊收回Will Smith期待以久、終於到手嘅首個影帝小金人，但目前未有定案。