有言道簡單就是美，作為軍用無人偵察機，唔一定要好高科技，俄羅斯海鷹-10 型無人偵察機最近被烏克蘭擄獲，經過拆解分析驚覺原來咁簡單，直接將一部Canon單鏡相機 Canon EOS 750D DSLR放入去加個電路板連接一部商用熱顯像儀，無人飛機內燃料罐則用塑膠樽加一層硬式塑膠外殼製作，加油時直接將塑膠樽蓋扭開後即可。不過呢隻Orland-10無人偵察機2010年推出寫明Made in Russia官方一架造價87,000～120,000美元，唔係平野。而實際上如果要彷製大學生都造到出來！

烏克蘭軍方近日發放影片語帶嘲諷向鏡頭介紹俄國無人偵察機Orlan-10經拆解後的結果，表示剛擄獲時烏軍拍左照片打算傳畀北約，想送去布魯塞爾進行精密分析，結果北約回應呢款無人機不可能太精密，烏克蘭自己處理就可以，無研究價值。烏克蘭軍方將機身拆解分析之後發現內部主要偵測設備就係直接放一部 Canon EOS 750D DSLR相機連接電路路同一部商用熱顯像儀，然後飛機機體就真係同模型飛機一樣，且燃料罐居然用塑膠飲料樽改裝，要加油就直接將塑膠樽蓋打開注入！結構同造功都非常簡單，令烏克蘭軍方大感詫異。不過唔好笑佢，因為俄軍大量使用在空中偵測都為烏克蘭軍隊帶來不少麻煩。 行動途中如果發現呢種無人機就要盡快疏散，以免遭到後續砲擊或空襲。

睇返官方規格，海鷹-10（Orlan-10）無人偵察機由位於聖彼得堡特殊科技中心（Special Technology Center, STC）於 2010 年推出，係一款可由步兵攜帶小型無人機，使用簡易彈射軌道發射起飛，並用內建的降落傘回收，可攜帶約 6 公斤的裝備，最高時速為 150 公里，任務半徑 140 公里。呢款無人機自2014 年克里米亞危機開始，就經常出現於頓巴斯地區，作戰經驗豐富自敘利亞內戰以及 2020 年亞美尼亞－阿塞拜疆戰爭中都有該款無人機蹤影。最有趣係官方造價，據STC 公司公布的造價，一架 Orlan-10 造價為87,000～120,000 美元，製作費追到歐美同級產品絕不便宜，但內部最核心的偵查設備竟然直接使用商用相機，令人疑惑實際軍費用左去邊度？