近年Netflix可謂影視界霸權級存在，唔單止於全球不停開戲、開劇，而且製作成本或收購成本都屢創新高，背後原因當然係因為佢好有錢，而啲錢就係來自全球超過2億、而且不停增加嘅用戶人數。不過Netflix昨日公佈2022年第一季業績，其用戶人數不升反跌，更預計今年第二季前再少200萬用戶。

據Netflix公佈，今年第一季訂閱人數流失20萬人，雖然實際人數唔多，對比起2.21億總用戶黎講亦只係九牛一毛，但卻係該指標超過10年來首次下跌 (對上一次係2011年10月，當時流失80萬人)，而且事前各大分析師都估計Netflix用戶人數會繼續增加，最樂觀者更預計會增加270萬人，現時不升反跌可謂跌破大眾眼鏡。另外值得一提嘅係，Netflix公佈嘅用戶數字係未減去因俄羅斯入侵烏克蘭而暫停當地業務所損失嘅大約50萬名訂閱用戶。

《Red Notice》拍攝成本就已然2億美金

Netflix方面就將用戶人數下跌歸咎於「用戶分享密碼 (即係夾單)」 以及「競爭激烈」。聯合CEO兼首席內容長Ted Sarandos表示，Netflix需要「繼續加強核心服務，即係劇集、電影，以及現時大家喜愛嘅遊戲」，佢亦指出Netflix於某啲核心地區嘅滲透率已經非常高，要訂閱Netflix嘅人都已經訂哂，所以要搵新嘅方法有效地從每次觀看中賺錢。而呢個「新方法」，就係Netflix過去一直不齒嘅廣告。另一名聯合CEO Reed Hastings指，Netflix目前正研究一個較便宜，但有廣告嘅訂閱計劃。

資料來源：Netflix、Variety