相信大家喺成長階段或多或少都曾經向Bandai「進貢」過唔少錢，你以為依家大個啦，有錢買玩具都冇時間玩就可以避免？咁你就錯啦！因為Bandai最近創立咗個新品牌「Bumpin'」，簡單黎講就係用返Bandai手上嘅遊戲、動漫作品去出手機殼！大家一樣會乖乖進貢！

「Bumpin'」呢個名有「碰撞」之意，一來當然係代表佢個手機殼會保護你部電話，二來亦係代表「設計」、「物料」、「品質」三方面嘅創意。而Bumpin' 嘅第一彈手機殼，就用上經典遊戲《Pac-Man (食鬼)》以及《Tekken (鐵拳)》為主題，再搵黎包括香港插畫師「Tik Ka From East」等來自全球嘅插畫家，設計出機殼背面嘅圖畫，絕對唔係求其印個角色、Logo上去就算嘅粗製濫造之作。

你話你對《Pac-Man》同《Tekken》冇咩興趣？你大可以放心，因為Bumpin'亦已經預告，會於今年第四季推出以《Naruto》、《我的英雄學院》、《機動戰士高達 SEED》以及《咒術迴戰》等多套大熱日本動漫嘅手機殼，相信總有一款會Hit中動漫迷嘅心。不過要留意嘅係，目前Bumpin' 淨係話第二彈手機殼適合「新iPhone」使用，相信就係指預計今年9月公佈嘅「iPhone 14」，換言之大家想用呢幾款手機殼，就要先換機？