機械人行路，估一種蔬菜！答案係……「銀芽」，因為機械人行路會「銀芽」、「銀芽」咁嘅聲…哈哈哈哈哈係咪好好笑呢……

就緊係唔係啦頂！呢啲文青小學二年班就已經嫌佢低B嘅IQ題，今時今日竟然仲有大台飲食節目拎出黎當新聞講，真係令人佩服佢哋嘅勇氣！又或者換一個角度講，可能個主持真係好鐘意「機械人」或者「銀芽」！唔食菜嘅文青對銀芽就冇咩好感，但對於機械人我都一樣好有愛！猶其是係大機械人！淨係「勇者系列」同「藍光人系列(即係絕對無敵三部曲)」都夠啦！

近日美國網站io9就選出「十大最偉大的大型機械人」，睇下你又有冇同感？

第10位：吉普賽危機號 《太平洋戰爭》

吉普賽危機號(Gipsy danger)係2013年電影《悍戰太平洋(Pacific Rim)》中，由美國製造嘅「第三級」機甲獵人(Jaeger)。亦都係主角萊利先後與哥哥和森真子合力駕駛嘅「主角機」。高80公尺、重1980噸，胸口有核動力渦輪機，左右手分別有離子炮與仲縮性長劍。於電影最後被啟動核反應堆自我溶毀系統，將「突破點」炸成碎片。

第9位：女武神VF-1《超時空要塞》

可能係整個日本動畫史上第一部識得完全變型嘅大型機械人－－雖然人型狀態「只」高12.68公尺，重18500公斤－－亦可能係唯一一款有三種形態嘅變形機：適合高速移動嘅戰機形態、適合白刃戰嘅人形形態，以及上半身係飛機，下半身係人形嘅「步行雞」形態。而且由於太有標誌性，以致喺故事後期，機齡已有三、四十年，老早就應該被取代嘅VF-1繼續不停出現。

第8位：大獸神《恐龍戰隊》

https://www.youtube.com/watch?v=huzzPx5XbMU

雖然係日本東映戰隊系列第十六套作品，但對香港以至美國嘅觀眾黎講，《恐龍戰隊》好有可能係大家第一套接觸嘅「戰隊」系列。當中嘅大機械人「大獸神」由五位以機械形態出現嘅「神」合體而成，當中包括成為雙腳嘅藍色三角龍與黃色劍齒虎、成為主體嘅紅色霸王龍、雙手嘅黑色長毛象，以及胸甲嘅粉紅(?)翼手龍。

由於喺美國掀起熱潮，所以仲有美版作品，大家依家個腦哼緊嗰首「Go Go Power Rangers」就係嗰度黎。

第7位：帝國級Titan《戰錘40000》

《戰槌40000》乃係英國經典末世科幻桌遊，由於故事太龐大同複雜，文青暫且表過不提。反正你需要知嘅就係「Titans」係其中一個名為機械神教(Adeptus Mechanicus)所掌營及製造嘅大型戰爭兵器，而「帝國級」就係當中最大同最強嘅型號。

第6位：百獸王《百獸王》

故事中由黃金旭、銀貴、黑鋼勇、青銅強及錫石宏等五名地球少年解放嘅傳說中守護神。實際上則由黑藍紅黃綠五隻守護獅子合體而成。

第5位：EVA 《EVA》

半生物半機械又半神嘅奇妙巨型兵器。一方面有如吸塵機一樣要拖住條電線周圍行，但另一方面又會好似阿媽咁突然之間暴走。獨特配色、兵器(例如超陽子炮同朗基努斯之槍)、加上故事設定令其成為日本動畫史上獨一無二嘅存在。

第4位：機械哥斯拉 《哥斯拉對機械哥斯拉》

歷代總共有四部巨型機械被冠上「機械哥斯拉」之名，昭和年代的兩隻為「黑洞第三惑星人」所造，目的係打敗哥斯拉並且統治地球。但到平成年代嘅兩部就改為由人類以哥斯拉為藍本製造，角色亦由侵略者改成保衛者。昭和年代嘅機械哥斯拉高120公尺，重約15萬噸；但平成年代嘅就大縮水，只有60米高，重約四萬噸。

第3位：鐵巨人 《鐵巨人》

又唔係個個巨型機器人都係打打殺殺嘅，例如出自1968年小說(Ted Hughes著)和1999年同名動畫電影《鐵巨人》入面嘅大型機械人，就係純粹黎整喊你。

根據電影，設定上為外星機械(生物?)嘅鐵巨人因不明原因而墜落美國緬因州，後來被9歲男孩Hogarth所救，兩人成為朋友。另一邊廂，特務Mansley發現鐵巨人，並認為佢威脅地球安全，於是聚集軍隊帶望將其摧毀。最後特務下令以核彈攻擊身在市中心嘅鐵巨人，鐵巨人得知核彈會追縱自己，決定飛離市鎮，最後在半空被撃碎。

第2位：高達 《機動戰士高達》

準確啲係「元祖高達」RX-78-2。作為一切嘅起點，「白色惡魔」衍生出N部膾炙人口嘅經典作品，其代表性係絕對毋容致疑。同時佢亦係改變整個日本「大型機械人動畫」生態嘅作品，因為佢乃係最早期嘅日本「真實系」動漫作品，透過嚴肅設定證明機械人唔一定只係適合走「超級系兒童向」路線。

第1位：柯柏文　《變形金剛》

再重伸一次，呢個榜係美國網站選出黎嘅，口味同我哋可能會有少少唔同，所以作為美國細路必睇動畫嘅《變形金剛》會上榜係一件好合理嘅事。而作為博派首領嘅柯柏文(Optimus Prime)就係當中最好嘅代表。呢位來自Cybertron嘅博派司令多以貨車頭型式出場，當中以G1時期的紅白藍設計最為經典，但又以近年真人電影版嘅設定最為炫目。