著名演員Leonardo DiCaprio最出名嘅…當然佢嘅演技，但第二出名嘅就大概係佢由24歲起就有個「女朋友唔可以過25歲」嘅「習慣」，佢唔單止冇同25歲以上嘅女仔拍過拖，而且幾任前度都係一到25歲就分手。不過黎緊佢就好有可能打破呢個習慣，而令佢破例嘅就係名模Gigi Hadid！

Leonardo DiCaprio嘅歷年女友年齡圖

現年47歲嘅Leonardo早前剛與6月啱啱滿25歲嘅女友Camila Morrone分手，正當大家以為佢會搵個25歲以下嘅新女友時，由9月頭起美國八卦雜誌就傳出Leonardo對Gigi Hadid「充滿興趣」嘅報導。卻說9月10日舉行嘅紐約時裝週Afterparty中，就已經有人見到二人一齊玩，而知情人士向《US Weekly》爆料指，Leonardo對Gigi Hadid非常感興趣，但女方就「依家唔想同佢進入浪漫關係住」。

幾日之後又有人爆出，於人稱「紐約夜王」嘅Richie Akiva喺9月11日舉行嘅派對中，見到Leonardo同Gigi Hadid二人，而且仲影到佢哋態度親匿咁面對面坐，二人不時交耳仔，仲有疑似「拖手」(雖然我覺得似握手多啲) 嘅畫面，令二人嘅緋聞傳得更加激烈。

圖片：DailyMail

一線演員配家世顯赫嘅一線名模，本身就已經非常值得大家討論，更何況如果兩人真係拍拖，就代表Leonardo首次打破「25歲限制」，花生指數已經好高；但更重要嘅係，現年27歲嘅Gigi Hadid，兩年前同當時嘅男友Zayn Malik生咗個女Khal，換言之佢依家係個媽媽黎，亦好有可能係Leonardo人生首個做咗媽媽嘅女朋友！Leonardo會為對方獻出兩個「第一次」，睇黎係真愛啦！