近年荷里活大舉擁抱左翼文化，例如迪士尼不停搵非白人演員出演理應係白人嘅「公主」、又有唔少經典電影嘅翻拍版本加入LGBTQ+嘅角色以至情節，雖然呢啲決定引來不少反彈，但睇黎佢哋短期內都唔會改變。而最新加入呢個行列嘅，就有新版《綠野仙蹤》。

早前Warner Bros. 確認會翻拍經典歌舞片《綠野仙蹤 (The Wizard of Oz)》，而編劇及導演一職就交由非裔嘅Kenya Barris一手包辦。近日Kenya接受《Variety》訪問時，就確認新版電影中會加入LGBTQ+等「現代元素」，以反映目前嘅現實世界。

「原版係一個寓言，反映當時處於大衰退及沙塵暴 (Dust Bowl) 嘅世界。依家我哋就要將鏡子對準目前呢個世界，從LGBTQ社群、不同文化及社會經濟族群中提取角色，講一個反映現實嘅故事。我認依家係咁做嘅最好時機。」

原版《綠野仙蹤》於1939年上映，被譽為史上最經典歌舞片以至最經典電影之一，多年都處於各「百大電影」榜單之上，其中電影歌曲《Over The Rainbow》唔單至係美國電影學會選出嘅「百大電影音樂」之首，更加係街知巷聞嘅經典音樂。

資料來源：Movieweb