近年有多部影視、電玩作品都用上「Cyberpunk」風格，加上Netflix嘅《Cyberpunk: Edgerunners》大受歡迎，頓時掀起一股Cyberpunk熱潮。而過往大家諗到「Cyberpunk」，都會諗起香港著名嘅霓虹燈招牌以及密集建築，不過隨住香港嘅霓虹燈招牌買少見少，世界上又有邊個地方有呢種「Cyberpunk」景色？答案就係日本愛媛縣，仲要係一個警局。

酸性雨に煙る近未来警察 pic.twitter.com/63cCGAaj5h

— ニュー伊吹 (@ibuki_inter) September 29, 2022

卻說專門拍攝日本貧民地區 (ドヤ街)嘅攝影師「ニュー伊吹 (@ibuki_inter)」，日前於Twitter上發佈咗一張拍攝於愛媛縣新居濱警察局嘅夜景照，可以見到該警局嘅樓頂豎立住兩個大型霓虹燈招牌，一個寫住「交通安全」、另一個就係「暴力追放 」 (即係「驅遂惡霸」嘅意思)，再配上落完雨嘅濕氣，令警局充滿Cyberpunk風格。「ニュー伊吹」發文時亦寫道：「被酸雨包圍嘅近未來警察。」

ネオン好きの新居浜警察
交差点を赤く染める。 pic.twitter.com/lKPQx0K3QP

— ニュー伊吹 (@ibuki_inter) September 30, 2022

據當地網民指出，呢類霓虹燈招牌其實係新居濱警察局附近特有嘅景色，主要其實係夜間用黎提醒駕駛者注意安全、唔好超速之類，所以背後嘅訊息其實都非常正面。不過亦有網民指出，Cyberpunk作品中出現嘅城市，大都係治安唔太好，當地警局用呢個風格黎宣傳好似有啲反效果。唔知大家又點睇呢幾個招牌呢？