環保的確係人類一個重要議題，唔少企業近年亦以環保之名推出新政策，好似一眾手機生產商就決定跟機唔再送充電線 (但唔減價)，而日本Starbucks早前亦推出「重用杯」，希望減少即棄杯用量繼而減少碳排放。但早前NHK節目就報導，重用杯其實比即棄杯更唔環保。

圖片：日本Starbucks

卻說日本Starbucks早前與一間叫「NISSHA」嘅公司合作，推出「Re & Go」重用杯服務，簡單黎講就係顧客買咖啡時可以選用金屬杯，而且可以直接拎走飲用，飲完之後將個杯還返去Starbucks或其他合作商店，NISSHA就會收回啲杯、清洗過後再送返去Starbucks分店。理論上就可以減少使用即棄杯，睇落去係一個更環保嘅方法。

但NISSHA都想知道「Re & Go」實際上嘅環保效用，所以自行進行研究，並於NHK節目中公佈研究結果。

即棄杯 (左) 與重用杯 (右) 嘅每次使用碳排放比較

但結果就發現，即使一個重用杯被使用100次，而且每次回收嘅車輛都係收夠2/3載貨量先開車，每次使用重用杯嘅碳排放，都係比起用即棄杯要多。NISSHA指出，「Re & Go」整個過程有三大碳排放來源，一個係生產、廢棄金屬杯所產生，另一個係清洗金屬杯時產生，仲有就係運輸金屬杯時嘅汽車排放，其中清洗及運輸所產生嘅排放，都會隨使用次數而穩定增加，唯一能夠隨使用次數而攤薄嘅就只有生產時嘅碳排放，所以即使一個金屬杯被重用100次，其每次使用嘅碳排放都係高於使用即棄杯。

NISSHA坦言調查結果連佢哋都覺得驚訝，但就表示唔會放棄「Re & Go」以至其他重用餐具服務。佢哋話今次研證明環保係需要持之以恆嘅習慣，只要大家堅持得夠耐，重用杯就會比即棄杯更環保。